Tá OT Baile Átha Cliath ina Ceannródaí maidir le Taisteal Gníomhach, Marc Taistil Óir Níos Cliste

Published: Déardaoin 16 Aibreán 2026 - 15:11

Bronnadh an Marc Taistil Níos Cliste ar Ollscoil Teicneolaíochta Bhaile Átha Cliath (OT Baile Átha Cliath) ag leibhéal Óir, an leibhéal aitheantais is airde faoin gclár náisiúnta faoi stiúir an Údaráis Náisiúnta Iompair (NTA). Aithnítear leis an ngradam tiomantas na hOllscoile taisteal inbhuanaithe a chur chun cinn i measc mac léinn, ball foirne agus cuairteoirí chun úsáid níos mó a bhaint as bheith ag siúl, rothaíocht agus iompar poiblí.

Tugtar aitheantas do cheannaireacht OT Baile Átha Cliath tríd an Marc Taistil Níos Cliste ag leibhéal Óir a bheith bainte amach maidir leis na bearta atá cur i bhfeidhm a éascaíonn agus a thacaíonn le roghanna iompair inbhuanaithe ar fud a cúig shuíomh campais. Leagtar béim sa ghradam ar obair na hOllscoile chun iompar taistil a athrú trí thionscnaimh a dhéanann roghanna comaitéireachta atá neamhdhíobhálach don chomhshaol níos insroichte agus níos tarraingtí dá pobal.

Tá OT Baile Átha Cliath ar cheann de na hinstitiúidí ardoideachais is mó a ghineann turais i réigiún Bhaile Átha Cliath le thart ar 28,000 mac léinn agus 3,500 ball foirne ar fud a gcuid campas. Tá an Ollscoil ag cabhrú le tionchar a imirt ar níos mó ná 30,000 duine maidir lena gcuid roghanna taistil laethúla trína rannpháirtíocht sa chlár Taistil Níos Cliste, ag cur le cathair níos sláintiúla, níos sábháilte agus níos inmharthana.

Is é an t-iompar is cúis le 21% d’astaíochtaí gás ceaptha teasa na hÉireann faoi láthair, rud a fhágann gurb í an dara hearnáil is mó i ndiaidh na talmhaíochta. Tá sé mar aidhm ag tionscnaimh Taistil Níos Cliste OT Baile Átha Cliath aghaidh a thabhairt ar an dúshlán sin trí roghanna iompair gníomhacha agus poiblí a spreagadh agus úsáid carranna aontaistealaí a laghdú ag an am céanna.

Dúirt an Dr Deirdre Lillis, Uachtarán OT Baile Átha Cliath, ag ócáid chun éacht na hOllscoile ar Champas Ghráinseach Ghormáin na hOllscoile a cheiliúradh:

“Táimid thar a bheith bródúil gur bhaineamar amach an leibhéal is airde den Mharc Taistil Níos Cliste ag an leibhéal Óir. Léiríonn an t-aitheantas seo tiomantas láidir leanúnach OT Baile Átha Cliath d’ollscoil níos inbhuanaithe, níos insroichte agus níos freagraí ó thaobh an chomhshaoil de a thógáil. Táimid ag leanúint d’infheistíocht a dhéanamh i dtionscnaimh ar fud na gcúig champas ar fad a fhágann gurb é an taisteal inbhuanaithe an rogha is éasca dár gcuid mac léinn, ball foirne agus cuairteoirí.”

“Léirítear cé chomh leochaileach agus atá geilleagair dhomhanda fós mar gheall ar ár spleáchas leanúnach ar bhreoslaí iontaise leis na forbairtí geopholaitiúla is déanaí, lena n-áirítear an choimhlint sa Mheánoirthear agus cur isteach ar phríomhbhealaí muirí amhail Caolas Hormuz. D’fhéadfadh fiú an riosca a mheastar a bheith ann go gcuirfí isteach ar shreafaí ola agus gáis suaitheadh praghsanna, éiginnteacht soláthair agus iarmhairtí eacnamaíocha níos leithne a spreagadh. Léiríonn na himeachtaí sin a phráinní atá sé dlús a chur leis an aistriú chuig córais iompair agus fuinnimh inbhuanaithe.”

‘Tá ról tábhachtach ag ollscoileanna maidir leis an aistriú sin a stiúradh. Tá OT Baile Átha Cliath ag cuidiú le hastaíochtaí a laghdú agus ag an am céanna athléimneacht a neartú i leith na suaití fuinnimh atá ag tarlú ar fud an domhain faoi láthair trí thaisteal gníomhach, iompar poiblí agus soghluaisteacht ísealcharbóin a spreagadh. Is éacht agus spreagadh é an gradam Óir seo, agus táimid ag tnúth lenár gcuid iarrachtaí a leathnú chun tacú le taisteal gníomhach ísealcharbóin dár bpobal ollscoile.”

Dúirt Jennifer Boyer, Leas-Uachtarán don Inbhuanaitheacht in OT Baile Átha Cliath:

“Aithníonn an Marc Taistil Óir Níos Cliste seo an iarracht chomhchoiteann ar fud phobal OT Baile Átha Cliath chun rogha phraiticiúil tharraingteach a dhéanamh den taisteal inbhuanaithe le haghaidh turais laethúla.  Táimid ag obair chun taisteal gníomhach agus ísealcharbóin a dhéanamh mar ghnáthbhealach chun dul chuig ár gcuid campas agus eatarthu trí áiseanna rothaíochta feabhsaithe, naisc níos fearr le hiompar poiblí agus rannpháirtíocht láidir le mic léinn agus le baill foirne a chur ar fáil.

Tá sé ríthábhachtach astaíochtaí iompair a laghdú má táimid chun spriocanna aeráide na hÉireann a bhaint amach, ach baineann tairbhí láithreacha leis freisin don tsláinte, don fholláine agus do cháilíocht ár dtimpeallachta uirbí. Léiríonn tionscnaimh amhail an clár um Thaisteal Níos Cliste conas is féidir le hollscoileanna gníomhú mar shaotharlanna beo ar mhaithe leis an tsoghluaisteacht inbhuanaithe, rud a chabhraíonn le nósanna taistil a mhúnlú a théann i bhfad níos faide ná an campas.”

I mí Feabhra 2025, ba í OT Baile Átha Cliath an chéad institiúid ardoideachais ilchampais in Éirinn a rinne iarratas aonair ar an Marc Taistil Níos Cliste agus tugadh aitheantas di le gradam uile-ollscoile.

Tacaítear le hobair na hOllscoile maidir leis an iompar inbhuanaithe ó líonra leathan mac léinn, taighdeoirí agus ball foirne ar fud na ndámh, mol taighde, Aontas na Mac Léinn, clubanna agus cumann, foirne seirbhísí gairmiúla, Coiste an Champais Ghlais agus Comhairle Inbhuanaitheachta na hOllscoile.

D'éirigh go hiontach le OT Baile Átha Cliath freisin i nGradam na Mac Léinn um Thaisteal Níos Cliste de chuid an Údaráis Náisiúnta Iompair, agus bronnadh an chéad áit uirthi le trí bliana anuas, rud a léiríonn cur chuige láidir na hOllscoile atá bunaithe ar chleachtas i leith na hinbhuanaitheachta, na nuálaíochta soghluaisteachta agus an athraithe iompraíochta.

 Tá an Ollscoil anois i measc grúpa beag ollscoileanna Éireannacha atá tar éis an Marc Taistil Óir Níos Cliste a fháil, ag aithint bearta den scoth a thacaíonn le comaitéireacht inbhuanaithe agus ghníomhach.